Ang kinabuhi sa tawong kabos

Hanigan kanunay sa mga pag-antos

Apan kon ikaw tawong kugihan

May paglaom alang sa kalampusan.

Kay bisan pa ang mga adunahan

Kon magpasagad lang ug magsalig

Ug sa dautang bisyo sila magpatuyang

Ang ilang kadato makuyaig.

Busa ayaw hilaki imong kapakyasan.

Paningkamot sa kadakin-as ikaw mobangon.

Tindog himoa laing hunat sa pakigbisog

Hangtod kalampusan imong makab-ot.

Himoang gumaran ang pakigbisog

Asdanga kanunay ang hagit sa kapalaran.

Saligi ang imong kakugi ug kaisog

Pagkab-ot sa gidamgo mong tingusbawan.

Kay sa ingon lamang niini nga paagi

Kitang tawo sa kalisod, ay, kabiyaan!

Wa nay luha sa kapait sa aping moagay

Kay pulihan man sa pahiyom sa kadaugan!