Usa ka balak alawiton nga gitagik ingon nga pahimangno sa masangpotanong buhat ni Sinogo, nga usa sa mga sulugoong manulunda ni Diwata Kaptan. Tungod sa iyang mapahitas-ong garbo ug kasina, gikawat ni Sinogo ang balaang budyong ni Magwayen. Naunay lamang siya sa iyahang pagbudhi sa pagpakahimo niyang usa ka buaya samtang miikyas siya patianod sa mga balod kay sa ngadto-ngadto naigo siya sa linti ni Kaptan nga misangpot sa iyang bug-os nga pagkatanggong sa pamayhon sa maong mananap sa tubig, unya nabalhog siya sa kangiob sa mga langob ilalom sa Siit Tanyon (Tañon Strait). Sa kasamtangan nagpabilin siyang usa ka daotang tilimad-on nga nabilanggo sa kahiladman diin naghari si Magwayen isip iyang dumalayong balantay nga mogalong kaniya sa dihang mopatuga siya og panglugnot sa gapos sa katubigan:

Sinogo nga mabudhion
Sa panagway'ng mahulgaon
Nga karon talamayon
Ingon nga tilimad-on
Nga masubli-sublion
Ang salâ sa kagahapon

Sinogo nga malipoton
Sa pamayhong malimbongon

labing maayo kining buhaton atol sa pagpalina diin mamahimong paasohan sa tumutuman ang iyang jamapala (rosaryohan kun lusokan sa mga sumusunod sa Darmahanong Tinuohan) samtang litokon niya kining maong pangadye:

Diwata nga maayohon
Amoy mahimayaon
panalangini karon dayon
lusok niini pagbalaanon
pahinungod nga pagadawaton

Magbaylo man gabii ug adlaw
sa kasamok ukon kamingaw
dili gayod kini matigaw
nga sa ginhawa da maminaw

nan dunggon Mo intawon
mga pulong-pangadyeon
nga pagalitokon puhon
ning pisi madugtongon
kalibotanon ug diwanhon

Inahang Kamatayon (Mother of Death)

Diwata sa Katubigan (God/Goddess of the Waters)

Hari sa Kaumagdan (Ruler of the Umalagads)

Dalan sa Kapalaran (the Path of Fate)

Banwag sa Kadagatan (the Beacon in the Sea)

Maglalawig sa Lalangban (Voyager in the River Lalangban)

Katimbang ni Indarang Kaptan (Kaptan's Equal)

Agalon ni Sinogong Sinilotan (Master of the Condemned Sinogo)

Madungganung Pandaki sa Katubsanan (Great Pandaki of Redemption)

Mamumugsay sa Saadnong Sakayan (Rower of the Boat to the Afterlife)

Taghatod sa Kalag nga Tanan (Delieverer of All Souls)

Tig-undang sa Subli-subling Kahimugsoan (Ender of Recurrent Births)

Hari sa Kahiladman (Sovereign of thd Deep)

Balantay sa Kadagatan (Warden of the Sea)

Manggagabay sa Mingtaliwan (Guide of the Departed)

Balantay sa Minatay (Guardian of the Dead)

Ganghaan sa Tutulo ka Kalibotan (Gate of the Three Worlds)

Ang tubig nagbuhi
Ang tubig kinabuhi
Tubig ang tuboran sa pangamuhi
Tubig ang nagdala sa buot sa kinabuhi
Tubig mao ang diwa nga nauna sa ubang mitna

Sa wala pay kabalangayan
Sa wala pay kapulongan
Una pa mapikas ang kawayan
Ang tubig diha na daan

Gikanap kini ni Magwayen sa halapad nga kapunawpunawan
Aron matuman iyang tuyo
Ug dungan sa nagdaganas nga balod sa kamingawan
Ang unang ginhawa mingbutho

Kini ang wahig nga pagasubayon
sa kahimugsoan ug kamatayon
ngadto sa kahimtang nga dayon
Saylo sa kasublian nga makanunayon

sa mga nasayod niini sa tiunay
diha si Magwayen nga nagbantay
sa matag anib nga milabay
sa matag hugna nga milahutay

Ang tubig nga buhi
gipatubod ni Magwayen sa kalibotan
Sa pagpausbaw sa kinabuhi
Kay kini ang matuhopong kahulogan
Nga nagdagayday sa lukopngatanan

Om Awignamastu Namo Sidam

Gamhanang Hari sa Langit
Kanimo kami misangpit
umari Ikaw sa daklit
dungga among tuaw ug siyagit
dawata kini nga dalit
niining lunsay nga dapit
umari Ikaw sa lakbit
Balaang hayag sa kangitngit

Om Santi Santi Santi Om

Kasayoran:
Si Kaptan mao ang kahitas-ang diwata sa kalangitan alang sa tinuohan sa mga kukaraang Kabisay-an. Sagad siyang nailhan sa paggahom sa hangin ug kilat, ug sa ubang kasuginlan, siya mao ang nagbuhat sa kinaunhang lalaki ug babaye, nga sila Sikalak ug Sikabay, nga nangbutho gikan sa napikas nga kawayan.

Kalag-kalag: Adlaw sa mga Umalagad
Ni Bisayology

Isaulog nato ug tagaan og pahinungod ang mga hamiling katigulangan nga atong pinangga ug hinigugma. Atoa usab pasidunggan ang halangdong abyan nga si Magwayen isip ang taghatod sa mga kalag ngadto sa pikas kinabuhi. Sanglit nagpahimagno kini kanato nga ang kamatayon dili ang kataposan hinunoa mao kini ang paghibalik ngadto sa gigikanan sa kinabuhi. Pinaagi niini, maugmad nato ang kamapaubsanon, pagkamapasalamaton ug pagtahod sa kinaiyanhong kasublian sa pagkaanaa, diin makat-on kita sa matawhay nga pagkinabuhi uban sa katubigan ug sa katigulangan nga atoang gimanggad.

Busa sampiton, dayawon ug pahimayaon nato sila sa matag duaw nato sa pahulayan:

"Kaumagdan, Kaumagdan, mga kalag sa amoang katigulangan, gidapit kamo namo buyon ning gidagkot nga kalayo, tagamtama kining sinugatan nga amoang gihikay alang kaninyo, dimdima kini nga buhong sa gugma ug kaayo."

Nagdibuho, Alfred Galaroza