Binuang uyamot ang konsepto sa creatio ex nihilo
dili mahimo kun imposible ang creatio ex nihilo nga buot ipasabot "pagmugna gikan sa wala"
1. pinasunod sa gumaranong panabot, "walay wala nga anaa kun ang wala gani dili gayod mahimong anaa"
2. pinasikad sa pisika, misupak kini sa unang balaod sa termodinamika
sumala pa sa usa ka ang teyista nga nagsunod sa klasikang o kukaraang griyegohanong pagsabot sa diyos, mahimo kuno sa diyos ang tanan apan matod usab kanila dili usab makabuhat ang diyos og mga kasukwahian sa lohika/pangatarongan
pananglit, ang 2+2 dili gayod mahimong motumbas sa 5, dili mahimong wad-on sa diyos ang iyang pagkadiyos ingon man nga dili siya makabuhat og bug-at uyamot nga bato nga dili nila mahimong aswaton.
nan tataw gayod nga may kinutoban ang diyos sulod sa lohika. wala gayoy kawalaan sa kahulogan niana daan busa dili gayod kana mahimong usa ka butang nga anaa sanglit sukwahi kana sa lohika.
ug tungod giisip sa teyista nga axiom (kun usa ka masukaranong katinuoran) ang diyos, nga usa ka dumalayong pagkaanaa, nagkahulogan gayod nga gimugna sa diyos ang lukopngatanan gikan sa iya mismong kaugalingon. Mihaom kini sa emanasyonismo (ang pagtuo nga ang lukopngatanan nagatubod mismo gikan sa diyos) ug panteyismo (ang pagtuo nga ang diyos mao ang mismong lukopngatanan) busa atong mapangataposan nga ang lukopngatanan gama mismo sa diwa, uyok kun pagkamao sa diyos.
Malimbongon gayod ang kadaghanan sa mga apolohistang teyista, ipasumangil nila ang lohika aron makalusot sa suliran nga dili mabuhat sa diyos ang tanan samtang moingon dayon sila usab nga ang diyos labaw ug saylo pa sa lohika. Giilin-ilinan ra nila ang lohika kon kanus-a mouyon kun mopabor kanila.
- Arjuna Dalakilat's blog
- Login or register to post comments
Comments
Batoc sa Pagbatoc sa Pagbuhat nga sa Uala (Creatio ex Nihilo)
Binuang lamang ang pagbuhat nga sa uala cun magcasayop usab ang casondan (axioma).
Nahauna, ang cahologan sa "tanan". Dayag nga gipacaholog nimo ang "tanan" nga maglabot sa gauas sa catarungan. Ang polongang "lima mahimo sa pagdugang sa duha sa duha" dili man matarung, ug busa gauas sa catarungan. Ipacasonod ba nga mabuhat ang bisan unsa nga gauas sa catarungan? Ug mabuhat cana, busa matarung cana ug dili na maangcong gauas sa catarungan.
Usab, ang polongan uala man ug cahologan. Ug ang uala ug cahologan uala usab ug pagcamao, cay ang uala ug cahologan dili man botang. Ipacasonod ba nga pabuhaton nimo ang Tagcatarungan sa botang nga uala ug cahologan? Busa, pabuhaton nimo ug uala ang Diyos nga Tagmao. Ang Diyos dili man Taguala cay ang uala dili man matungod cay uala man cini ug pagcamao. Summa potentia non nihil creat (ang gahom nga hingpit dili macauala).
Icadha, ang cahologan sa pagbuhat nga sa uala. Uala cini magholog nga ang Diyos gumican sa uala, cay ang paggican magholog man gayud sa aduna. Ug pacamaohon ang uala, busa pacaadonahon nimo ang uala. Supac cana sa pagcauala sa uala.
Ang creatio ex nihilo nagholog lamang nga ang Diyos, sa uala pa ang pagbohat, uala ug cabuhatan nga bisan unsa ug, busa, cay ang Diyos lamang ang adona sa uala pa ang pagbohat, sa Diyos lamang ang bisan unsa nga binohat sa Diyos, nga hingpit ug aduna. Dili gumican sa Diyos apan sa Diyos. Usa pa, ang Diyos ang nahauna ug catapusan, busa uala ug bisan unsa nga gauas caniya. Matood cini, cay ug nahauna pa ang uala sa Diyos, busa pacaadonahon nimo ang uala.
Sa pagcatagola, aduna ca ug mangagimpacasonod nga sayop uyamut ug, busa, ang tibooc nimo nga paciglalis saypan usab.